[x]
7. október 2020

Breytingar á húsnæði ÍSOR vegna COVID-19

Mikið álag hefur verið á slökkviliðs- og sjúkraflutningafólki Slökkviliðs höfuðborgarsvæðisins (SHS) frá upphafi COVID-19 faraldursins og miðað við fjölda smita er líklegt að svo muni verða á næstunni. Álagssveiflur vegna COVID kalla á aukinn mannafla á vakt, á sama tíma og mikilvægt er að skipta starfsfólki á vakt upp í smærri hópa til að koma í veg fyrir að missa marga í sóttkví eða einangrun.

Það er ánægjulegt að segja frá því að samkomulag hefur náðst milli SHS annars vegar og Íslenskra orkurannsókna – ÍSOR - hins vegar, um nýtingu SHS á hluta þess húsnæðis sem ÍSOR leigir af Ríkiseignum að Grensásvegi 9 í Reykjavík. Með því er SHS tryggð aðstaða fyrir tvo sjúkrabíla ásamt aðstöðu fyrir sjúkraflutningafólk.

Þegar hefur verið hafist handa við að tæma húsnæðið og gert ráð fyrir að SHS verði afhent það innan fárra daga.