[x]
14. janúar 2019

Samningur um jarðfræðikortlagningu undirritaður

Í lok desember var undirritaður samningur milli ÍSOR, umhverfis- og auðlindaráðuneytisins og Náttúrufræðistofnunar Íslands um átaksverkefni í jarðfræðikortlagningu Íslands og skráningu jarðminja næstu tvö árin.

Eins og fram kemur á vef Stjórnarráðsins eru jarðfræðikort í nákvæmum mælikvarða, kortlagning jarðminja og skráning þeirra mikilvæg forsenda vandaðrar áætlanagerðar og ákvarðanatöku í umhverfis-, náttúruverndar- og skipulagsmálum um land allt. Mikil vöntun hefur verið á jarðfræðikortum í stórum mælikvarða af Íslandi og kveður samningurinn á um útgáfu jarðfræðikorta a.m.k. þriggja landsvæða í mælikvarðanum 1:100.000 á samningstímanum. Þá náist áfangar í kortlagningu a.m.k. tveggja svæða til viðbótar auk þess sem mótuð verði framtíðarstefna um kortlagningu landsins alls.
Náttúrufræðistofnun hefur hafið skráningu á jarðminjum í þar til gerðan gagnagrunn. Fyrir liggur hjá stofnuninni að halda þeirri skráningu áfram þannig að nýta megi hann til að meta verndargildi jarðminjanna á faglegum forsendum. Gerir samningurinn ráð fyrir skráningu 250-300 jarðminja á samningstímanum.

Þessi samningur markar á vissan hátt tímamót í jarðfræðikortlagningu Íslands og gerir ÍSOR kleift að halda áfram þeirri jarðfræðikortlagningu sem fyrir var. Eftir efnahagshrunið 2008 hóf ÍSOR markvissa gerð og útgáfu jarðfræðikorta í mælikvarða 1:100.000, í fyrstu mest á eigin kostnað en síðar með góðum stuðningi Landsvirkjunar. Alls eru fjögur jarðfræðikort komin út frá árinu 2010, öll í mælikvarðanum 1:100 000 og eitt kort af öllu landinu í mælikvarðanum 1:600 000. Sjá má útgefin jarðfræðikort hér á vef ÍSOR.

Jarðfræðikortin og upplýsingar um jarðminjar, sem verða til vegna samningsins, verða gjaldfrjáls á rafrænu formi og þannig aðgengileg öllum en gert er ráð fyrir að pappírsútgáfa verði aðgengileg gegn gjaldi.

Jón Gunnar Ottósson, forstjóri Náttúrufræðistofnunar Íslands, Guðmundur Ingi  Guðbrandsson, umhverfis- og auðlindaráðherra og Ólafur G. Flóvenz, forstjóri ÍSOR við undirritun samningsins rétt fyrir jól 2018. Ljósmynd frá umhverfis- og auðlindaráðuneytinu.