9. júlí 2018

Kristján Sæmundsson hlýtur verðlaun Jarðfræðifélags Bandaríkjanna fyrir jarðfræðikortlagningu og jarðhitarannsóknir

Kristján Sæmundsson jarðfræðingur. Ljósmynd

Jarðfræðifélag Bandaríkjanna (The Geological Society of America, GSA) tilkynnti á vefsíðu sinni 5. júlí að Kristján Sæmundsson, jarðfræðingur hjá ÍSOR, hefði hlotið verðlaun samtakanna fyrir framlag sitt til jarðfræðikortlagningar og jarðhitarannsókna.

Samtökin veita árlega nokkur verðlaun fyrir framúrskarandi framlag til jarðvísinda og þá einkum í Bandaríkjunum. Þau verðlaun sem Kristján hlýtur að þessu sinni eru kölluð „Florence Bascom Award for Geologic Mapping“. Þau voru veitt í fyrsta sinn árið 2015. Verðlaunin eru viðurkenning fyrir framlag til jarðfræðikortlagningar sem leitt hefur til nýrrar vísindaþekkingar og/eða uppgötvunar hagnýtanlegra jarðrænna auðlinda og hafa stuðlað að auknum skilningi á hugtökum og grundvallarferlum í jarðfræði. Verðlaunahafinn þarf að hafa verið höfundur að nákvæmum jarðfræðikortum, jarðfræðisniðum og yfirlitsskýrslum sem hafa öðlast vísindalega viðurkenningu sem eru í senn aðgengileg fræðimönnum og almenningi.

Kristján hlýtur verðlaunin fyrir brautryðjendastarf í jarðfræðikortlagningu og rannsóknum sem hafa stuðlað að byltingarkenndum breytingum á skilningi manna á jarðfræði og brotakerfum Íslands og Norður-Atlantshafs og fyrir framlag sitt til jarðhitarannsókna og þróunar sem hefur haft gífurlegt þjóðhagslegt gildi á Íslandi.

Jarðfræðikortlagning og útgáfa jarðfræðikorta er starf sem margir koma að. Kristján hefur verið höfundur að langflestum jarðfræðikortum sem gefin hafa verið út á Íslandi. Hann er frumkvöðull á þessu sviði og fremstur meðal jafningja. Síðustu árin hefur hann unnið ásamt samstarfsfólki sínu hjá ÍSOR að útgáfu nýrra og nákvæmari korta en áður hafa verið gefin út á Íslandi og kom fimmta kortið út í síðasta mánuði. Hægt er að skoða nýjustu kortin í kortavefsjá á heimasíðu ÍSOR.

Viðurkenning Kristjáns nær einnig til hins mikla og ómetalega framlags hans til nýtingar jarðhita á Íslandi til orkuvinnslu. Þótt fjölmargir jarðvísindamenn ÍSOR hafi komið að þeim málum í gegnum tíðina finnst varla sú hitaveita eða það jarðgufuver á Íslandi þar sem Kristján hefur ekki lagt hönd á plóg með rannsóknum, ráðgjöf og óbilandi áhuga sínum í meira en hálf öld.

Það var fyrrverandi samstarfsmaður Kristjáns við rannsóknir á jarðfræði Flateyjarskaga, Barry Voight, áður prófessor við Ríkisháskólann í Pennsylvaníu, sem tilnefndi Kristján til verðlaunanna.

Á myndunum hér að neðan er Kristján Sæmundsson við hitamælingu á jarðhitasvæðinu í Fremrinámum (Ljósmynd Magnús Ólafsson) og að störfum í Hvalfirði (Ljósmynd Sigurður G. Kristinsson).

Kristján Sæmundsson við hitamælingu á jarðhitasvæðinu í Fremrinámum. Ljósmynd Magnús Ólafsson.

 Kristján Sæmundsson að störfum í Hvalfirði. Ljósmynd Sigurður G. Kristinsson.